2009 йилдаги дастурлар ва тадбирлар
Элчи Норланднинг Қаршига қилган сафари (03/17/2009)
17 март куни АҚШ элчиси Ричард Норланд Қашқадарё вилоятидаги Қарши шаҳрига ташриф буюрди ва маҳаллий мулозимлар билан қатор учрашувлар ўтказди. Вилоят ҳокимининг биринчи ўринбосари Э.Мамадиёров ва ҳокимиятнинг бошқа ходимлари элчини самимий кутиб олдилар ҳамда вилоятдаги вазият ҳақида гапириб бердилар.
Элчи Норланд, шунингдек, АҚШнинг истеъфодаги Адмирали Жон Бёрд етакчилигида Таҳдидни Камайтириш бўйича Агентликнинг делегациясига ҳамда Ҳамкорликда Таҳдидни Камайтириш Сиёсати бўйича директор Жим Ридга ҳамроҳлик қилиб, яқинда Қаршида барпо этилган Тиббиёт ва ветеринария бўйича Вилоят Диагностика Лабораториясини бориб кўрди. Ушбу лаборатория АҚШ Мудофаа вазирлиги қошидаги Таҳдидни Камайтириш Агентлигининг Биологик Таҳдидни Камайтириш дастури билан ҳамкорликда қурилган ва био-терроризм ва био-патогенлар тарқалишига қарши курашга қаратилган АҚШ ва Ўзбекистон ҳамкорлигининг ажойиб мисолидир.
Еттинчи кичик тумандаги Нодирабегим номли бошланғич мактабнинг ўқувчи ва ўқитувчилари элчини қутлаш учун катта таассурот қолдирувчи саҳна чиқиши уюштирдилар. Элчига мактаб ҳовлиси ва синфларни кўрсатар эканлар, ўқувчилар математика, география ва бошқа фанлар бўйича ўз билимларини намойиш этдилар. Элчи Норланд мактабнинг инглиз тили дастурини қўллаб-қувватлаш мақсадида бир қанча китоблар ва плакатлар тақдим этди.
Сўнг элчи Норланд Қаршидаги Сержантлар Академиясига ташриф буюрди. У ерда АҚШ Армиясининг ҳарбий санитарлари Ўзбекистон Қуролли кучларининг санитарларига жанг майдонида етказилган жароҳатларни муолажа қилиш йўлларини намойиш этдилар. Элчи Норланд 30 ҳарбий санитарга сертификатлар топширди.
Бу галги ташриф 2007 йил 13 сентябрда Тошкентга келган элчи Норланднинг Ўзбекистондаги ўн тўртта маъмурий ҳудудларга уюштирган сафарининг ўн биринчисидир.
