Элчихона янгиликлари
АҚШЭлчихонаси 11 сентябр воқеаларининг 8 йиллигини хотирлаб, "Хотира куни"да қатнашишга рағбатлантирмоқда (09/11/2009)
2001 йил 11 сентябрдаги террорчилик ҳужумларининг 8 йиллиги муносабати билан АҚШ Элчихонаси жамоаси ушбу фожиали воқеаларни хотирлаш учун йиғилди. Элчихона ходимлари ва ташриф буюрганлар АҚШ денгиз пиёдаларининг 11 сентябр террорчилик ҳужумларида ҳаётдан кўз юмганлар хотираси учун байроқни флагшток ярмигача туширишларини кузатдилар. Элчи Норланд тўпланганларга, жумладан 100га яқин Чай Чат клубининг иштирокчиларига мурожат қилар экан, ўша мудҳиш куннинг талафотлари билан биргаликда мусибат туфайли юзага чиққан жасорат ва қаҳрамонлик ҳақида ҳам гапириб ўтди. Элчининг нутқидан сўнг қатнашчилар бир дақиқа давомида сукут сақладилар, бу маҳаллий вақт билан соат 17:46да бўлиб ўтди – айни шу вақтда 11-рейс билан учувчи самолёт Жаҳон Савдо Марказининг Шимолий Минорасига урилган эди. Элчи Норланд меҳмонларни Элчихона томонидан уюштирилаётган “Хотира куни”нинг хайрия тадбирида ва ҳужжатли фильм намойишида ҳам қатнашишга чақирди.
“Вақтингизни ажратиб, бугун 2001 йил 11 сентябр воқеаларининг 8 йиллигини хотирлаш мақсадида бутун дунё бўйлаб йиғилган инсонлар қаторидан жой олганларингиз учун миннатдорлик билдираман. Кўплаб америкаликлар учун 11 сентябр воқеалари бизнинг ҳаётимизда ва бизнинг халқимиз учун ҳал қилувчи лаҳза бўлиб қолмоқда. Ҳатто бугун ҳам ўша вайронгарчилик ва 3000га яқин турли миллат ва эътиқодга мансуб бўлган эркак, аёл ва болалардан иборат инсонларнинг ҳаётдан кўз юмганлигини тўла англаш қийин. Америкаликлар билан биргаликда яна 90 та мамлакатнинг фуқаролари Виржиния, Нью-Йорк ва Пенсилвания штатларида ҳалок бўлишди, шулардан бири Ўзбекистон фуқароси бўлиб, у Жаҳон Савдо Маркази қулаганида унинг ичида бўлган.
Ўзбекистондаги Дипломатик корпус дуайени, Туркманистон Элчиси бугун эрталаб менга қўнғироқ қилиб, террорчилик ҳужумларининг саккиз йиллик муносабати билан ўзининг Америка Қўшма Штатларига бўлган ҳамдардлигини билдирди.
11 сентябр воқеалари ўлчаб бўлмас фожиага айланганди. Аммо ўша куннинг даҳшатлари билан биргаликда, биз катта жасорат, қаҳрамонлик ва фидокорлик каби фазилатларга гувоҳ бўлдик – бу фазилатлар ўз ҳаётларини ёрдамга муҳтож бошқа инсонлар учун қурбон қилган ёрдам хизматларининг ходимлари ҳамда Пенсилвания осмонларида террорчиларга қаршилик кўрсатиб, қаҳрамонларга айланган фавқулодда фуқароларда мужассамлашган. Бутун дунё давлатларидан миллионлаб инсонлар террорчилик даҳшатларини кўриб, ҳозир радикал шахсларнинг озодлик машъалини тўсиш каби ҳалокатли ақидаларига қарши бирлашган ҳолда ёнма-ён туришганини кўряпмиз. Ушбу муқаддас санада биз ўзимизни мана шу мақсадларга бағишлаймиз.
Президент Барак Обама [Президент Обаманинг 11 сентябр Баённомаси] 2001 йил 11сентябр мудҳиш воқеаларининг 8 йиллигини Хотира Куни сифатида нишонлашга америкаликлар ва дунё бўйлаб барча АҚШ Элчихоналарини рағбатлантирди. Шу боис, АҚШнинг Тошкентдаги Элчихонаси 22 сентябр соат 17:00да хайрия тадбири ва “Эътиқоддан Ташқари” номли ҳужжатли филмнинг намойишини ташкиллаштирмоқда [тадбирга таклифнома]. Ушбу таъсирли филм 11 сентябр куни ўз турмуш ўртоқларидан жудо бўлган икки оддий Америка оналари ҳақидадир. Аммо бу аёллар қайғу аламига ботиб қолмай, ўзларини Афғон бева аёлларига ёрдам бериш учун бағишлаганлар. Биз барча қатнашчилардан хайрия учун кичик бир совға олиб келишларини сўраймиз – мисол учун, оддий совун, сочиқ, кир ювиш воситалари, ўйинчоқлар – биз буларни маҳаллий етим болалар уйига топширамиз.
Биз Ўзбекистон фуқароларига 11 сентябр воқеалари юзасидан кўрсатган ёрдамлари ва ҳамдардликлари учун миннатдорлик билдирамиз. Жаҳон ҳамжамияти билан биргаликда ўзбекистонликлар ҳам АҚШда рўй берган фожиаларни кузатишди. Бунга жавобан Ўзбекистон ҳам АҚШ ва бутун дунё мамлакатларининг терроризм илдизларини таг-тубидан қўпориб ташлаш ва дунёда тинчлик ўрнатиш ҳаракатларига қўшилди. Мана шу муқаддас мақсадни амалга ошириш учун ҳар куни ҳисса қўшаётган шу заминдаги ҳар бир кишига миннатдорлик изҳор қиламиз. Сиз билан бирга Тошкентда хизмат қилиш мен учун шарафдир”.
- Элчи Ричард Норланд, АҚШ Элчихонаси, Тошкент, 2009 йил 11 сентябр.