Пресс-релизлар 2008
Close Window
Барча Президент этиб сайланган Барака Обаманинг сайловда ғолиб чиқиши муносабати билан сўзлаётган нутқига диққат билан қулоқ тутмоқда
АҚШда бўлиб ўтган тарихий Президент сайловини томоша қилиш учун юзлаб киши тўпланди (11/05/2008)
5 ноябрь куни АҚШда бўлиб ўтган Президент сайлови натижалари билан тўғридан-тўғри эфир орқали танишиш мақсадида эрталаб соат 6:00 дан тушга қадар Тошкентдаги «Интерконтиненталь» меҳмонхонасига 350 дан зиёд киши тўпланди. Улар бутун дунёдаги миллиардлаб кишилар қаторида Америка Қўшма Штатларининг биринчи афро-америкалик Президенти – Барак Обама сайланган жонли сиёсий жараёнга гувоҳ бўлишди.
Ўзбекистон ҳукумати мулозимлари, турли олий ўқув юртлари ва умумтаълим мактабларининг ўқитувчилари, НДТ етакчилари, журналистлар, таниқли маданият ва маориф вакиллари, тадбиркорлар, дипломатик корпус вакиллари ҳамда Ўзбекистонда яшаётган америкаликлар иккита йирик экран орқали «CNN» ва «BBC» телеканалларининг сайлов натижаларига оид хабарларини кузатди. Девордаги йирик полотноларда Сайлов коллегияси, Республикачилар ва Демократик партия номзодларнинг сиёсий қарашлари акс этган маълумотлар намойиш этилди. Кўнгиллилар, жумладан, АҚШдаги сайловларни билвосита кузатган алмашинув дастурларининг собиқ талабалари АҚШдаги сиёсий жараён билан боғлиқ тушунчаларини меҳмонлар билан ўртоқлашдилар.
Тадбир қатнашчиларининг аксариятини ёшлар ташкил этди ва улар ўз фаолликлари билан ажралиб турди. Меҳмонлар рамзий маънодаги Президент сайловида овоз беришди ҳамда рамзий референдумда қатнашдилар. Шунингдек, улар АҚШдаги сайловларга оид викторинада ўз билимларини синаб кўришди ва президентликка номзодларнинг табиий катталикдаги фотосуртлари билан биргаликда суратга тушишди. Президентликка муносиб деб хисоблаган номзоднинг кўкрак белгиларини тақиб олган меҳмонлар АҚШдаги сайлов жараёни ҳақидаги хилма-хил материалларга ҳам эга бўлишди.
Йиғилганлар Сенатор Жон Маккейннинг сайловдаги мағлубиятдан кейин берган баёнотини, сўнгра Президент этиб сайланган Барак Обаманинг сайловда ғалаба қозониши муносабати билан сўзлаган нутқини диққат билан тинглашди. АҚШнинг Ўзбекистондаги фавқулодда ва мухтор Элчиси Ричард Норланд эса ўз нутқида ушбу сайловнинг тарихий аҳамиятига урғу бериб, инсон ҳуқуқлари ҳимоячиси, муҳтарам Мартин Лютер Кингнинг «Бир орзуим бор» деб номланган нутқидан парча келтирди.
Ҳам Маккейн, ҳам Обама тарафдорлари, хуллас тадбирда иштирок этганларнинг барчаси, Обаманинг сайловда ғолиб чиқиши билан ниҳоясига етган «ривожланиш жараёнидаги тарих»ни кузатаркан, унинг нечоғлик катта аҳамиятга эга эканлигини эътироф этишди.
