Пресс-релизлар 2008
Америка киносига бағишланган фестиваль кўплаб томошабинларни ўзига жалб қилди (11/16/2008)
14-16 ноябрь кунлари АҚШнинг Ўзбекистондаги Элчихонаси кўплаб ёш томошабинларни ўзига жалб қилган Америка фильмлари фестивалига ҳомийлик қилди. Киночилар музейида ўтказилган уч кунлик фестивалда эски фильмлар билан бир қаторда янги ишланган фильмлар ҳам намойиш этилди, йиғилганлар эса америкача фильмларни мириқиб томоша қилишди.
Жума куни кечқурун фестиваль “Заколат” (2000) номли бадиий фильмни намойиш этиш билан бошланди. Мазкур фильмда ўзгаларга ёрдам қўлини чўзиш нечоғли муҳим аҳамиятга эгалиги урғуланади. Асли инглиз тилида бўлган ушбу фильм русча тагёзув билан намойиш этилди. Унда, асосан, Америкада турли жамоаларга хизмат кўрсатиш ва муҳтож кишиларга ёрдам бериш анънаси акс этирилган. Шанба куни Элчихона учта классик бадиий фильмни томошабинлар эътиборига ҳавола қилди. Булар “Ғарбий қирғоқ тарихи” (1961), “Изқуварлар” (1956) ҳамда “Римга саёҳат” (1953) (инглиз тилида русча таржимаси билан) номли фильмлардир. Томошабинларнинг аксарияти “Ғарбий қирғоқ тарихи” ва “Изқуварлар” фильмларини биринчи марта кўраётган бўлса, “Римга саёҳат” фильми анчадан буён Ўзбекистонда машҳур бўлиб кетганди. Шунга қарамай, томошабинлар Элчихона бу фильмни ҳам фестивалда намойиш этганидан жуда мамнун эканликларини билдиришди, чунки улар бундай ажойиб фильмни биринчи марта инглиз тилида кўришга муваффақ бўлишди. Қолаверса, кўпчилик бу фильмни тўлалигича биринчи марта томоша қилаётганди. Фестивалнинг сўнгги кунида яна учта янги фильм – “Ўйинчоқ можароси” (1995), “Дэйв” (1993) ҳамда “Ўрмондаги бир тентак” (1994) намойиш этилди. “Ўйинчоқ можароси” мультфильми фестивалда иштирок этган жуда кўп болалажонларга манзур бўлди ва катталарнинг ҳам эътиборини тортди.
Ҳар бир фильмнинг намойишига турли соҳа вакиллари бўлган 100-150 киши ташриф буюрди. Уларда мактаб ўқувчилари ва университет талабалари, чет эллик дипломатлар ва журналистлар, Элчихонанинг маданият соҳасида фаолият юритувчи ҳамкорлари ҳамда кенг жамоатчилик иштирок этди. Элчихона келгусида ҳам бундай кинофестивалларни тез-тез ўтказишни режалаштирган.
