Аксил-наркотик бўйича ўқув курслари ўзбекистонлик зобитларга қўл келмоқда
25 Март 2008 йил
НАТО-Россия Кенгаши ҳомийлигида ўтказилган лойиҳа доирасида малакасини оширган Ўзбекистон ҳуқуқ-тартибот ходимлари яқинда Ўзбекистон ҳудуди орқали олиб ўтилаётган катта миқдордаги героинни қўлга олдилар.
“Салкам 570 килограмм героин моддаси Миллий Хавфсизлик Хизмати (МХХ) ва Ўзбекистон Республикаси Ички ишлар вазирлиги билан ҳамкорликдаги амалиётда қўлга киритилди ” дейди МХХ ходими. “Тахминимизча, гиёҳванд моддалар Тожикистонда ундирилган ва Ўзбекистоннинг жанубий вилоятлари орқали олиб ўтилаётган эди. Биз мусодара қилган миқдор 10 миллион АҚШ доллари қийматидаги етти тоннадан зиёд истеъмолга тайёр “кўча” наркотигини етиштиришда ишлатилган бўларди”.
Наркотик моддалар, Ўзбекистоннинг Қашқадарё вилоятида тезкор ходимлар томонидан юк машинаси аниқланганда ва текширилганда қўлга киритилди. 368 килограммдан зиёд героин моддаси юк машинасида яширилган метал қутидан топилди. Текширувлар давомида яна 200 килограмм наркотик аниқланди. МХХга кўра, юк машинаси ноқонуний юкни яшириш мақсадида қорамол олиб кетаётган эди. Қўлга туширилганларга қарши жиноий иш очилди ва терговлар бошлаб юборилди.
Амалиётда иштирок этган бир қанча зобитлар Бирлашган Миллатлар Ташкилотининг Гиёҳванд моддалар ва жиноятга қарши кураш идораси (ГМЖҚИ) томонидан олиб борилган аксил-наркотик текширув курсларида малакаларини оширганлар. Бу курслар Марказий Осиё ва Афғонистон зобитлари учун аксил-наркотик трейнинглар бўйича НАТО-Россия Кенгаши ҳомийлик қилаётган синов лойиҳа доирасида амалга ошмоқда. 2005 йилнинг декабрь ойида бошланган ушбу синов лойиҳа гиёҳванд моддаларнинг ноқонуний савдосига қарши курашга жалб қилинган ҳуқуқ-тартибот ходимларининг лаёқатини мустаҳкамлашни кўзда тутади. НАТО мамлакатлари ва Россия мутахассислари иштирокчиларни тайёрлайди. БМТнинг ГМЖҚИ - синов лойиҳасининг ижрочи вакили сифатида фаолият юритади. 2007 йилнинг охирига келиб, вилоятдан қарийб 330 ходим ушбу ташаббус бўйича тайёрланди.