Нутқлар
Элчи Ричард Норланднинг Америка Мустақиллик кунига бағишланган нутқи (07/03/2008)
АҚШ Элчихонаси, Тошкент
Олий Мажлис Сенати раиси жаноб Собиров, Қонун чиқарувчи палата cпикери Ташмухамедова хоним, Бош вазирнинг биринчи ўринбосари жаноб Азимов, ҳурматли меҳмонлар, хонимлар ва жаноблар, ассалому алайкум, Америка Қўшма Штатлари Мустақиллигининг 232 йиллигига бағишланган байрамимизга хуш келибсиз. Сизни бу ерда кўриш биз учун шарафдир.
Ҳар йили, биз Тўртинчи июль байрамини муайян мавзуга бағишлаган ҳолда нишонлаймиз. Кўриб турганингиздек, бугунги тадбиримизга илҳом бахш этган мавзу Американинг 50чи штати Ҳавайидир. АҚШга 1959 йилда қўшилган Ҳавайи штати, Америка Қўшма Штатлари жойлашган қитъа соҳилидан анча олисда, Тинч океанида вулқон оқибатида юзага келган саккизта оролдан иборат.
Ҳавайи ҳар жиҳатдан ранг-баранг бўлган ўлкадир. Ҳавайининг туб аҳолиси бўлмиш америкаликлар, асли европалик ва япониялик америкаликлар билан ёнма-ён ҳаёт кечирадилар ва меҳнат қиладилар. Аксар қисми битта йирик қитъада жойлашган Америка Қўшма Штатларида, Ҳавайи ороллари табиати бутун мамлакат қиёфасига қўшимча фазилат бахш этади.
Қуруқлик билан ўралган Ўзбекистондан Ҳавайи ороллари тубдан фарқ қилади. Аммо одамлар самимийлиги, чуқур маданий мерос ва меҳмондўстликнинг қадимий анъаналари икки юртга хосдир.
Биз, Ўзбекистонда истиқомат қилаётган америкаликлар, бир неча юз кишидан, жумладан болалардан иборат бўлган кичик бир гуруҳмиз ва юртимиздан олис олисдамиз.
Бироқ, бу ерда бўлиш биз учун шарафдир. Ишонамизки ўзбекистонлик дўстларимиз ва ҳамкасбларимиз билан биргаликда, шарқ ва ғарб, шимол ва жанубни бирлаштиришда муҳим аҳамиятга эга бўлган минтақа - Марказий Осиёдаги умумий манфаатларни илгари суриш томон иш олиб бормоқдамиз.
АҚШ ва Ўзбекистон муносабатларининг ўсиш суръати тобора ошиб бормоқда. Биз биргаликда демократик ислохотлар ва инсон ҳуқуқлари борасида иш олиб бормоқдамиз. Биз биргаликда талабалар алмашинуви сонини ошириш учун иш олиб бормоқдамиз. Биз биргаликда сармоя муҳитини яхшилаш учун иш олиб бормоқдамиз. Кираверишда сиз кўрган Chevrolet Nexia автомобили General Motors компаниясига асос солинганига 100 йил тўлганининг рамзий белгисидир. Биз биргаликда Афғонистон масаласи бўйича иш олиб бормоқдамиз.
Биз ўзаро ҳурмат руҳида бу ишларни амалга оширмоқдамиз. Сўнгги йилларда қаердадир ишонч йўқолган бўлса, биз уни қайта тиклашга интилмоқдамиз.
Мақсадимиз, фақатгина 17 йил муқаддам мустақиллик эришил-гандан бери, қизиқарли аммо машаққатли йўлдан боришда давом этаётган, Ўзбекистон халқи билан ишлаш ва шунингдек ундан ўрганишдир. Катта ишлар амалга оширилди. Ғурурланишга арзийдиган кўп ютуқларга эришилди. Ва албатта, олдинда бажарилиши лозим бўлган ишлар кутмоқда. Бу ишларни биз биргаликда амалга оширишимиз мумкин.
Олдимизда турган йил давомида биз Ўзбекистон билан ҳамкорлигимизни жадаллаштиришни интиқлик билан кутиб қоламиз.
Алоҳа! Яна бир бор хуш келибсиз ва бизнинг 232чи туғилган кунимизга бағишланган байрамни биз билан бирга баҳам кўринг.
