Янгиликлар ва тадбирлар
АҚШ Халқаро Тараққиёт Агентлиги Марказий Осиёда пандемик ва парранда тумови лойиҳасини ишга туширди (09/15/2008)
15 сентябрь куни Америка Қўшма Штатлари Халқаро Тараққиёт Агентлигининг Қозоғистон, Қирғизистон, Тожикистон, Туркманистон ва Ўзбекистон учун пандемик ва қуш тумовига қарши қаратилган янги дастури иш бошлади.
Қирғизистон пойтахти Бишкек шаҳрида бўлиб ўтган расмий очилиш маросимида АҚШ Халқаро Тараққиёт Агентлигининг Марказий Осиё бўйича минтақавий миссияси Директори Уиляьм Фрей “Ушбу лойиҳа Марказий Осиё ҳукуматлари ва парранда гўшти ишлаб чиқарувчиларига ўз фуқаролари ва иқтисодларини юқори патогеник парранда гриппининг ҳатто чекланган равишда қўзғалишидан келиб чиқувчи жиддий оқибатларининг олдини олишда ёрдам беради”, деди.
Марказий Осиё мамлакатларига парранда гўштининг катта қисми Хитой, Эрон, Россия, Покистон ва Афғонистондан келтирилади. Бу мамлакатларда юқори патогенли парранда гриппи тарқалгани тўғрисида маълумотлар мавжуд. Қолаверса, 2006 йил мартдаги Қозоғистон ва Озарбайжондаги парранда гриппининг тарқалиши бу инфекция минтақада соғликка, озиқ-овқат таъминоти ва даромадга таҳдид эканини кўрсатади.
АҚШ Халқаро Тараққиёт Агентлигининг пандемик ва парранда тумовига қаратилган лойиҳаси парранда гриппини режалаштириш, кузатиш, назорат қилиш ва олдини олиш, шунингдек, юзага келиши эҳтимоли бўлган касалликка тайёргарлик, унга йўлиққанларни даволаш бўйича экспертлар кўмаги ва зарурий ресурслар билан таъминлайди. Лойиҳа касалликка чалинган паррандалар билан ишлайдиган кишилар учун касаллик қўзғалган пайтдаги хавфсизлик чораларини кўриш билан ҳам шуғулланади.
Лойиҳа Марказий Осиёдаги бешта мамлакатдан келган 25 нафар ветеринар ва соғлиқни сақлаш бўйича мутахассислар учун беш кунлик ўқув машғулоти ўтказиш билан ўз фаолиятини бошлаб юборди. Машғулот иштирокчилари парранда гриппи аломатлари ва дезинфекциялаш учун халқаро майдондаги тавсиялар билан танишди, жумладан, улар намуна олиш, синовдан ўтказиш, намуналарни сақлаш ва олиб ўтишни ўрганишди. АҚШ Халқаро Тараққиёт Агентлиги машғулотларнинг самарали ўтиши учун 23 000 доллар миқдоридаги ҳимоя ва диагностика ускуналари билан таъминлади. Лойиҳа ушбу машғулотда қатнашганлар ўз юртларига қайтиб боргач, олган билимларини ўз ҳамкасблари билан ўртоқлашишларига умид билдиради.
АҚШ Халқаро Тараққиёт Агентлигининг пандемик ва парранда тумовига қаратилган лойиҳаси АҚШ Халқаро Тараққиёт Агентлиги Америка халқи номидан Марказий Осиёда амалга ошираётган кўплаб кўмак лойиҳаларининг бири саналади. 1992 йилдан буён Америка халқи АҚШ Халқаро Тараққиёт Агентлиги орқали Марказий Осиёдаги иқтисодий ўсиш, демократик институтлар, соғлиқни сақлаш ва таълим тизимини қўллаб-қувватлашга қаратилган кўмак дастурларини 1.5 миллиарддан ортиқ маблағ билан таъминлади.
